Telefonat Apple dhe Android të shënjestruar nga spyware italianë
Mjetet e hakerimit të një firme me bazë në Itali u përdorën për të spiunuar telefonat inteligjentë të Apple dhe Android në Itali dhe Kazakistan, tha Google të enjten, duke hedhur dritë mbi një industri “lulëzuese” të spyware.
Ekipi i analizës së kërcënimeve të Google tha se spyware i krijuar nga RCS Lab synonte telefonat duke përdorur një kombinim taktikash, duke përfshirë “shkarkime të pazakonta” që ndodhin pa dijeninë e viktimave.
Shqetësimet mbi spyware u nxitën nga mediat që raportuan vitin e kaluar se mjetet Pegasus të firmës izraelite NSO u përdorën nga qeveritë për të vëzhguar kundërshtarët, aktivistët dhe gazetarët.
“Ata pretendojnë se u shesin vetëm klientëve me përdorim legjitim për pajisjet e mbikqyrjes, të tilla si inteligjenca dhe agjencitë e zbatimit të ligjit,” tha specialisti i sigurisë kibernetike celular Lookout për kompani si NSO dhe RCS.
“Në realitet, mjete të tilla shpesh janë abuzuar nën maskën e sigurisë kombëtare për të spiunuar drejtuesit e biznesit, aktivistët e të drejtave të njeriut, gazetarët, akademikët dhe zyrtarët qeveritarë,” shtoi Lookout.
Raporti i Google tha se softueri spiun RCS që zbuloi, dhe i cili u quajt “Hermit”, është i njëjti që Lookout raportoi më parë.
Studiuesit e Lookout thanë se në prill ata zbuluan se Hermit po përdorej nga qeveria e Kazakistanit brenda kufijve të saj për të spiunuar telefonat inteligjentë, vetëm disa muaj pasi protestat anti-qeveritare në atë vend u shtypën.
“Ashtu si shumë shitës spyware, nuk dihet shumë për RCS Lab dhe klientelën e tij,” tha Lookout. “Por bazuar në informacionin që kemi, ajo ka një prani të konsiderueshme ndërkombëtare.”
Burimi: https://techxplore.com